Covalima (RCCT) 26-11-21, Komisaun Organizadora (KO) ba 28 de Novembru iha Municipio Covalima hahu ona realiza atividade kultura, Feira no Bazar Kalan hodi Anima Komunidade sira iha Ambito Komemorasaun Loron Proklamasaun Independensia ba dala 46.
Ba Jornalista RCCT Prezidenti Komisaun Organizador 28 de Novembru Francisco de Jesus Alves iha intervista hateten, molok atu komemora 28 Novembru, Covalima hahu hala’o ona atividade sira hanesan kompetisaun, Animasaun kultural, Feira no Bazar Kalan.
“Ami nia preparasaun maka ne’e konaba atu selebra loron proklamasaun Independensia ami nia seksaun sira preparadu hotu ona iha atividade balun maka, ita komesa hahu ona hanesan Feira no Bazar Kalan no mos animasaun kultural” dehan Prezidenti Komisaun Organizador 28 de Novembro Francisco de Jesus Alves.
Fransisco Alves Salienta, atividade ne’e mos Komisaun mos Preve Osan ba Aktividade desportu Tradisional Iha Komemorasaun 28 de Novembru ne’e.
“Ita tau osan uit oan atividade Desportu maibe, ita halo Desportu Tradisional, dada tali, hadudu, tutur lolo, Ida ne’e hanesan Desportu Tradisional ne’ebé maka ita nia inan aman no Beiala sira hala’o nanis ona, ohin atu festeja Loron 28 Novembru ita hamosu fali, nune’e ita nia Bei Oan sira hodi kontinua fali hanesan patrimonio Covalima nian ” Tenik Fransisco de Jesus Alves
Entretantu Komisaun organizador preve orsamentu ba atividade Feira no Bazar kalan hamutuk Dollare Amerikanu $. 500.0, ba atividade animasaun kultural no Desportu hamutuk $ 600.00
Jornlista : Aje Ferreira
Editor : Chamot Nahac
