Covalima (RCCT) 14-06-21 Relasiona ho Pandémia moras Covid 19 nebe ameasa Mundiál no halakon ona ema barak nia vida iha Mundo ne’e, maka Diretur Aprovisamento Francisco Borges hateten, moras Covid-19 ne’e risku bo’ot liu ba ema nebe maka la simu Vasina, tanba ne’e nia husu ba Komunidade sira, labele tauk atu hakbesik ba Sentru saúde sira hodi simu vasina, tanba Pessoal Saúde sira iha ekipamentos sufisiente atu halo primeiru sokoru bainhira akontese buat ruma.
Lia hirak ne’e hato’o husi Diretur Aprovisamentu Francisco Borges iha Salaun Administrasaun Municipio Covalima bainhira lori Aimoruk Vasina Covid-19 AstraZaneka mai iha Municipio Covalima.
“ Ita labele ho tauk demais hodi lakoi simu vasina ne’e, tanba risku bot liu ba ema nebe maka la simu vasina, duke ema nebe maka simu ona vasina, tanba ne’e ha’u enkoraja Komunidade sira atu labele rona Doutur Facebook sira, labele rona informasaun nebe maka falsu hodi hatauk imi, tanba ita nia Pessoal Saúde sira bem treinado, iha ekipamento sufisiente atu halo primeiru sokoru bainhira buat ruma akontese ” Diretus Francisco Borges dehan.
Diretur Aprovisionamento Francisco Borges mos husu ba Komunidade sira iha Municipio Covalima, atu halo Vasinasaun hodi protégé an no protégé Familia no komunidade sira tanba Covalima hanesan Linha Fronteira ho Nasaun Vijiño Indonésia.
“Ha’u husu ba Komunidade sira labele rona Informasaun falsu, tanba Saúde ne’e iha ita nia liman rasik, tanba ne’e ha’u enkoraja ba Komunidade sira iha Covalima, atu hakbesik ba Sentru Saude sira hodi simu Vasinasaun, tanba Municipio Covalima halo Fronteira ho nasaun Vijiño Indonesia, tanba ne’e tenke simu vasina hodi protégé ita nia an, no sei la tau risku ba ema seluk ” Diretor Franscisco hakotu.
Tuir Informasaun nebe Jornalista RCCT Asesu katak, molok atu halo vasinasaun ba Komunidade sira, Ekípa Saúde sei halo ezaminasaun ba kondisaun ba ema nebe maka moras tensaun ka moras oioin.
Jornalísta : Tynho Gusmão
Editor : Chamot Nahac
