Covalima (RCCT) 19-01-2022, Relasiona ho Mudansa presu Sigaru ne’ebé dadaun ne’e folin Sa’e maka’as iha Merkadu Suai, maka Xefe Departamentu MTCI Munisipiu Covalima hateten Sigaru folin sa’e tanba Lei maka haruka hodi hamenus konsumu tabaku.
Xefe Departamentu MTCI Munisipiu Covalima Francisco João de Araújo Ribeiro informa Lei ne’e aprova ona husi Konsellu Ministru (KM) iha tinan kotuk maibe ate a data MTCI seidauk hare didi’ak Lei ne’e.
“Sigaru folin sa’e la’os negosiante sira maka hasa’e tuir sira nia hakrak, maibe Lei maka haruka hodi hamenus konsumu ka redús fuma, Lei ne’e iha tinan kotuk hetan ona aprovasaun husi Konsellu Ministru maibe ate agora MTCI seidauk hetan lolos ninia Lei ne’e tanba agora sei iha prosessu” Francisco dehan iha nia kna’ar fatin (19/01).
Vendedor husi Loja Adeba, Eduardo da Conseiçeião Soares hateten, iha antes ne’e Sigaru karton ida ho folin dolar atus hitu walu nulu resin ida ($ 781.00) maibe dadaun ne’e karton folin sa’e ba dolar rihun ida atus lima ($ 1.500.00), tanba ne’e obrigadu tenki Sigaru “L.A” Masu ida dolar rua ($ 2.00) no Marlboro masu ida ho folin dolar rua sentavu lima nulu ($ 2,50.00).
“ Sigaru agora ne’e folin sa’e maka’as, tanba uluk ami sosa ne’e karton ida tuju-ratus-lapan-pulu-satu dolar deit, maibe agora ne’e karton ida ami sosa seribu-lima-ratus dolar kedas, tanba ne’e maka ami fa’an L.A masu ida dua dolar, Marlboro dua dolar lima-pulu sen, ne’ebe ami hasa’e folin sasan tanba sasan iha ne’eba ne’e mos sa’e maka’as” Eduardo dehan iha nia Loja Laran (19/01)
Eduardo kontinua informa sasan seluk hanesan Fos no Bimoli mos folin sa’e maka’as tanba ne’e dadaun ne’e fos Saka ida ho folin dolar sanulu-resin-ha’at ($ 14.00) no Bimoli Kaixa ida dolar tolu-nulu-resin-rua ($32.00).
“Sasan Seluk mos iha liu-liu Mina Bimoli ne’e, tanba uluk Bimoli kaixa ida dua-puluh-dua dolar deit ($22.00), maibe agora ne’e tiga-puluh-dua dolar kedas ($32.00), depois Fos mos uluk ne’e dua-blas dolar lima-puluh-sen ($ 12.00) deit, maibe agora ami tenke fa’an ampat blas dolar ($ 14.00)” Eduardo informa.
Entretantu sasan hanesan Sigaru, Fos, no Bimoli la’os folin sa’e deit iha Munisipiu Covalima, maibe iha Munisipiu seluk mos kuaze hanesan.
Jornalista : Tynho Gusmão
Editór : Chamot Nahac
