Francelino ” Durante SS Professor sira iha ESGP Suai kumpri Dever “

Covalima ( RCCT) 21-06-21, Diretor ESGP Suai Francelino Freitas Carvalho hateten, Durante Estado Emergensia (EE) no Serka Sanitaria (SS) Professor iha ESGP Suai nafatin kumpri dever, maske aktividades hotu parado total.

Lia hirak ne hato’o iha Eskola Sekundaria Geral Publika Suai Bainhira hetan Vijita husi Ministro Edukasaun Joventude no Desportu (MEJD) iha Loron Sabado (19-06)Liu ba hodi halo lansamentu ba website eskola nian www.esgp-suai.tl iha sala de laboratorio komputador ESGP-Saui.

” Ami nia prosessu aprendisazem durante Estado Emergensia no Serka Sanitaria, Estudante hotu Feriado, maibe Ami nia Professor iha Eskola Ida ne Nafatin kumpri dever, hodi halo rezumu depois distribui ba Estudante Sira hodi Sira estuda iha Uma, maibe Estudante balun halai hotu ba foho hodi hela hamutuk ho Sira Nia inan aman sira “ Relata Francelino ba MEJD Armindo Maio iha momentu neba.

Francelino dehan Programa eskola ba Uma, Estudante barak maka la partisipa tamba, Estudante balu ba foho, no iha neba Rede internet la iha no Menus televisaun ho radio iha area rurais.

” Ami orienta ami nia Estudante sira atu partisipa iha Eskola ba Uma, nebe liu husi Televisaun ou Radio, maibe Estudante barak maka halai ba Foho, Nebe sira susar atu asessu ba Televisaun no Radio Tanba foho ne’e la iha Televisaun depois balun la uja telemovel ida ne maka prejudika Sira” Dehan Francelino Freitas.

Entertanto dadaun ne’e, Estudante sira iha Covalima hahu halo ensinu aprendisazem hanesan babain, Tanba loron Suspensaun remata ona.

Jornalista : Tynho Gusmao
Editor       : Chamot Nahac