Covalima (RCCT) 16-12-21, Mina “Bimoli” folin sa’e iha merkadu Suai Folin sa’e komesa fulan kotuk (Novembru), no Folin Manu Tolu no Trigu Folin sa’e maka’as iha fulan ida ne’e (Dezembru) impaktu husi sasan folin sa’e iha merkadu Nasional.
Xefe Departamentu Servisu Munisipal MTCI Munisipiu Covalima Francisco João de Araújo Oliveira rekoñese iha mos mundansa ba folin fos maibe sei konsidera hanesan mundansa ne’ebé normal.
“Razaun ne’e husi kedas Nasional, Iha ne’e Folin sa’e maka’as liu ne’e mak Mina ho Manu Tolun, Fos folin iha mudansa maibe ita bele dehan Normal hela, Mina Ne’e Folin sa’e husi kedas fulan kotuk. Manu tolun no Trigu mak iha fulan ida ne’e foin iha mundansa folin sa’e.” Xefe Departamentu dehan.
Xefe Departamentu ne’e kontinua relasiona ho folin sasan ne’ebé sa’e iha Municipio, MTCI Covalima seidauk hetan autorizasaun husi Diresaun Nasional hodi halo prevensaun iha merkadu, nia mos fundamenta mundasa ba folin sasan ne’e mos hahu kedas husi nasaun Importador sira ne’ebé hatama sasan mai Timor Leste liu liu iha Covalima.
““Konaba sasan ne’ebé iha Munisipiu ne’e sa’e, ita seidauk hetan autorizasaun husi Diresaun Nasional para atu halo Prevensaun ba ida ne’e, presu ne’e iha mudansa husi kedas Nasaun vijiñu sira ne’ebé importa sasan mai iha Nasaun ne’e” Katak Nia
Maske nune’e, Francisco João de Araújo Oliveira esplika, Servisu Munisipal MTCI iha Covalima Liu husi funsionariu regulasaun komersial hala’o Aktividade Rutina fulan ida dala rua hodi update folin sasan iha merkadu.
“Ami iha ne’e kada fulan ne’e sempre update dala rua ba folin sasan Sira iha merkadu, tuir dadus ne’ebé mak iha terrenu, Sasan iha item tolu mak iha mudansa ba presu ne’e mak hanesan Bimoli, manu tolun, no terigu no sasan sira seluk hanesan konstrusaun folin babain ne’ebé ami sei halo intervensaun bazeia ba Lei Númeru 29 ” Xefe Departamentu ne’e informa iha nia kna’ar fatin Kinta-Feira ohin (16/12).
Sorin Seluk, Negosiante Merkadu Suai Mateus Moniz Informa, sira nia parte sosa sasan iha Dili ho folin Sa’e maka’as, nia esplika sasan ne’ebé folin Sa’e maka’as maka fos ho Bimoli.
“Ami mos la hatene, Estadu maka husu Pajak karung liu ga halo nusa, tanba ami hola sasan iha Dili mos folin sa’e, entaun ami mai fa’an fali iha ne’e ezemplu Bimoli Lima liter uluk Lima dolar deit, maibe agora ne’e tenke $ 7.50 to’o $.8.50, tanba ami Sosa iha ne’eba mos Karun maka’as” Mateus dehan iha Merkadu Suai.
Sosa Na’in (Kompradora) Tereza Oliveira, sente triste ho folin sasan ne’ebé sa’e maka’as, tan ne’e nia husu ba Governu atu normaliza fila fali folin sasan ne’ebé dadaun ne’e sa’e maka’as iha mekadu.
” Sasan agora folin Sa’e maka’as, Uluk ne’e Bimoli 5 dolar deit, mas agora to’o 8 dolar, ne’e halo nusa, ami Kbi’it Laek ne’e atu kamat osan iha ne’ebé, Governu tenki muda fali nia sasan ne’e hanesan uluk” Tereza Informa iha Merkadu Suai.
Tuir informasaun ne’ebé Jornalísta asessu, folin sasan sa’e la’os deit iha Merkadu Suai, maibe iha Merkadu sira iha Munisipiu seluk mos kuaze hanesan, ho nune’e espera tempu besik Governu sei normaliza lalais sasan folin ne’ebé sae iha Merkadu Munisipal sira.
Jornalísta : Tynho Gusmão
Editór : Chamot Nahac
