Covalima (RCCT) 23-08-21 Forsa Humanísta Covalima (FHC) fo formasaun dahuluk kona ba Lian Xineza nian ba Estudante hamutuk 20 resin iha Municipio Covalima, Postu Maukatar Suco Belekasak, Aldeia Dais, nebe hahu iha Fulan Marsu tinan ne’e.
Presidente Forsa Humanísta Covalima (FHC) Gabriel Francisco de A. Ukat iha intervista hateten, Objetivu loke kursu ba Estudante sira kona ba lían Xineza tamba konsidera língua ne’e importante iha Mundu, no Objetivu seluk atu kapasita Estudante sira oinsa bele envolve an iha bolsu Estudu nebe maka iha.
“ Objetivu husi loke kursu Xineza ninian ba foin sae sira, tanba ita hare husi Lingua Xineza ninian mais faladu iha Mundu, ba iha Mundu ne’e lingua ne’e maka primeiru, depois ita hare situasaun aktual, ita hare maluk Timor oan barak maka hetan ona Bolsu Estudu ba iha Xina, tanba ne’e maka ita loke kursu ba foin sae sira, atu nune’e sira bele iha kapasidade utoan oinsa sira bele aplly bolsu Estudu Xina ninian ne’ebe maka iha ” Presidente FHC dehan (23/08)
Gabriel Francisco de A.Ukat informa, Forsa Humanísta Timor-Leste (FHTL) maka ho voluntáriu sei produs Sertifikádu ba Estudante 20 resin, nia hatutan Fulan Setembru Tinan ne’e sei distribui Sertifikadu ba Estrudante sira ne’ebe dadaun ne’e tuir Kursu kona ba Lian Xineza nian.
“ Loke Kursu ida ne’e ho voluntáriamente, depois FHTL rasik maka sei fo sertifikádu ho voluntáriamente, depois kursu ida ne’e foin maka primeira vez, tanba ami hatete tiha ona katak Forsa Humanista Covalima (FHC) ho Forsa Humanista Timor-Leste (FHTL) ne’e fo formasaun gratuita ba Foin Sae sira, ne’ebe fulan Setembru agora sira simu ona sira nia sertifikadu ” Gabriel Francisco dehan.
Engkuantu alende kursu Lian Xineza, iha mos kursu kona ba lingua portuguesa no lideransa, papel Estudante no Papel Juventude nian.
Entretantu ba futuru, Forsa Humanísta Covalima sei nafatin la’o ho prinsípiu nebe maka iha, kona ba Edukasaun noun Formal ninian, no Prisinsípiu seluk maka, “Ema ida seidauk matenek se bainhira nia seidauk fahe nia matenek ba ema seluk”.
Jornalísta : Tynho Gusmão
Editor : Chamot Nahac
