Festeza Loron Restaurasaun Independensia – Uniku Zumalai Realiza Deit Atividade Isar Bandeira

Covalima(RCCT)10-05-22–Komemorasaun Loron Restaurasaun da Independensia Timor Leste ba dala XX, iha Postu Administrativu (PA) Zumalai sei la realiza iha Atividade extra seluk hanesan Animasaun tanba Governu la aloka osan ba atividade refere so iha deit alokasaun orsamentu dollar amerikanu atus hitu lima nuluh ($750) ba Mobilizasaun Isar Bandeira RDTL no Serimonia Eukaristia ka Misa.

Prezidenti Komisaun Organizadora ba Komemorasaun 20 de Maiu iha PA Zumalai Martinho Moniz dos Santos dehan fundu ne’ebé iha aloka deit ba Isar Bandeira no missa, la iha fundu atividade animasaun ba komunidade sira.

“Atividade ne’ebé mak iha Postu Zumalai, Bazeia ba fundu ne’ebé mak iha, ami iha atividade mak hanesan misa iha dia 19 no iha 20 de Maiu halo Serimonia Isar da Bandeira” Informa Prezidenti Komisaun Organizadora ba Komemorasaun 20 de Maiu iha PA Zumalai Martinho Moniz dos Santos ba Jornalista sira Quarta Feira ohin.

Nia Hatutan iha Postu Administrativu Zumalai la realiza atividade animasaun tanba la iha fundu, tanba PA Zumalai hetan deit Alokasaun osan Dollar Amerikanu Atus hotu Lima Nuluh.

“Animasaun ba Komemorasaun 20 de Maiu la iha ne’e bazea ba fundu, tanba fundo ne’ebé mak husi Munisipiu, mai iha Postu ne’e ho montante Atus Hitu lima nulu ($750) deit, ne’ebé fundu ba animasaun nee la iha” Tenik Prezidenti Komisaun Martinho Moniz dos Santos.

Iha sorin seluk Xefe Suku Tashilin Martinho Magno iha hateten, hanesan Xefe Suku so organiza deit komunidade nune’e sirahodi ba tuir Serimonia Isar Bandeira, tanba kada Tinan Suku hotu hotu iha PA Zumalai konsentra deit iha Postu.

“Hanesan kada Tinan Ita selebra 20 de Maiu Suku hotu hotu tuir atividade iha Postu tanba ne’e Ami nudar Xefe Suku prepara Ami Nia komunidade ho Ami Nia Bandeira Suku ba tuir hasa’e Bandeira iha ne’eba, konaba ba atividade animasaun ida ne’e preparasaun hotu – hotu iha komisaun organizadora Sira iha Postu” Dehan Xefe Suku Tazhilin Martinho Magno.

Entretantu Martinho Moniz dos Santos hateten planu ne’ebé mak komisaun organizadora planea ona ba Komemorasaun Loron Restaurasaun da Independensia ba dala XX iha PA Zumalai mak iha deit atividade Serimonia Isar Bandeira iha dia 20 de Maiu 2022 seluk husi ne’e la iha.

Jornalista : Jhana Cardoso

Editor        : Chamot Nahac