Covalima (RCCT) 30-07-21 Extensionista hamutuk 37 nebe kompostu husi Municipio Dili, Likisa, Bobonaro inklui Covalima, nebe durante loron tolu tuir ona formasaun husi Food and Agrukulture Organization (FAO) kona ba Konservasaun Agrikultura iha Salaun Centru Joventude Covalima hetan Sertifikadu Apresiasaun husi FAO.
Ba Jornalista sira Diretor CSA Advisor Delfin da Costa hateten hafoin simu materia teoria, Extensionista sira hala’o kedan pratika iha to’os, atu nune’e sira bele komprende didi’ak kona ba lala’ok Konservasaun Agrikultura ne’e.
” Apresentasaun iha aula maioria sira komprende di’ak materia nebe maka treinador sira fo, depois horiseik ami mos ba kedas iha to’os laran neba para sira pratika kedas iha neba, hodi kuda lehe atu oho du’ut, Ida seluk kuda lehe hamutuk ho batar, nebe maioria implementa iha ida-idak nia Suco rasik ” Dehan Delfin
Extensionista husi Municipio Bobonaro Gasemiro Lopes hanesan partisipantes nia konsidera Formasaun kona ba Konservasaun Agrikultura ne’e hanesan materia foun, Tanba ne’e, nia agradese ba FAO nebe maka fasilita ona sira, nia promesa sei implementa iha nia suku rasik.
” Konservasaun Agrikultura ne’e hanesan buat foun ida mai ami Extensionista, oinsa ami bele komprende didiak, hodi nune’e bainhira ami fila ba ami nia Munisipio ami mos tenke halo buat ruma” Gasemiro ne’e dehan.
Entertanto Treinamento ne’e sei kobre hotu Municipio sira iha Territorio Nasional.
Jornalista : Tynho Gusmao
Editor : Chamot Nahac
