Covalima (RCCT) 11-01-21 Eskola Sekundaria Téknika Vokasional Kristal iha Munisipio Covalima sei atende ba kandidatus Estudante foun ne’ebe hakarak halo registrasaun iha Eskola ne’e rasik, tamba ne’e Diretor ESTV Kristal Covalima Goaldinho dos Santos Ferreira hateten, ba Estudante ne’ebe maka iha interese atu halao estudo iha Eskola ESTV Kristal bele halo registrasaun, tamba ba dadaun ne’e Eskola refere atende hela kandidatus Estudante foun.
Lia ne’e hato’o iha nia kna’ar fatin Eskola Sekundaria Téknika Kristal Munisipio Covalima.
“ Ba Estudante sira se maka iha intereseatu eskola iha ne’e bele mai halo registrasaun, tamba iha ne’e odomatan sei nakloke ba Estudante foun sira ne’ebe atu halo registrasaun ” Goaldinho dehan.
Diretor ESTV Kristal Covalima ne’e hatutan, antes atu hasoru Tinan foun, sira nia parte halo ona sosializasaun iha Eskola nivel Ensinu Basiku sira iha Covalima, atu nune’e estudante sir abele hatene hodi halo registrasaun iha sira nia Eskola ne’e rasik.
“ Antes remata tinan 2020 ba 2021 ne’e ami halo sosializasaun kada Eskola Ensinu Basiku ne’e ami tama hotu kedas, so úniku Eskola Kafe maka ami la ba, maibe informasaun sira hatene hela, ne’ebe hau nia lemon ba Estudante sira ne’ebe maka akaba ona iha Ensinu Básiku, se iha biban atu mai iha ne’e, ami sei atende ita bot sira ” Goaldinho dehan.
Entertanto Diretor ne’e esplika, dadaun ne’e sira nia parte regista ona kandidatus estudante foun hamutuk 100 resin, maibe nafatin loke oportunidade ba Estudante sira ne’ebe maka hakrak kontinua halo registrasaun iha Eskola refere.
Jornalísta : Tynho Gusmão & Saturnino Soares
Editór : Chamot Nahac
