Covalima (RCCT) 23-09-21, Estudante na’in Sanulu (10) husi Eskola Sekundaria Jeral Publika (ESJP) Suai simu Sertifikadu kona ba Kursu Jornalísmu Basiku Radio Fuzaun husi Radio Comunidade Cova-Taroman (RCCT) Munisipiu Covalima.
Ba Jornalísta sira Presidente Asosiasaun Radio Komunidade Timor Leste hateten, Estudante na’in 10 ne’e tuir ona treinamentu no Estajiu durante iha Fulan 3 iha RCCT, no Programa ne’e hanesan Projetu Pilotu ida nebe ARKTL kria ho objetivu atu enkoraja partisipasaun Komunidade sira ni’an ba Programa Radio Komunidade.
” Ohin ami fahe Sertifikadu ba Estudante nain Sanulu (10) ne’ebe partisipa ona formasaun kona ba Jornalísmu Radio Fuzaun nebe forma husi Radio Cova Taroman Suai, sira ne’e tuir treinamentu kumpri ona Fulan tolu depois Estagiu mos Fulan tolu iha Radio Cova Taroman, Programa ne’e ARKTL kria hanesan Projetu Pilotu ida, atu enkoraja komunidade nia partisipasaun ba Programa Radio Komunidade nian, no liu husi programa ne’e bele hamosu voluntariu foun hodi servisu hamutuk ho Radio Cova Taroman “ Presidente ARKTL ne’e dehan.
Iha Fatin ne’e Gestor Radio Comunidade Cova Taroman Suai Sancho Alves Nahac dezafia estudante sira atu aprende kona ba Jornalizmu baziku tanba Radio Comunidade Cova Taroman odomatan nakloke ba Estudante sira nebe maka iha vontade atu aprende Jornalísmu Basiku.
” Ha’u ohin dezafia ba Covalima oan sira nebe maka iha vontade atu aprende kona ba area jornalismu basiku, Radio Komunidade Cova Taroman odomatan nakloke atu sira bele mai aprende hamutuk depois fila fali ba sira Nia suco hanesan Jornalista Sivika (Wartawan Warga) hodi nune’e bele hafasil Autoridade Lokal sira atu hato’o informsaun ba Media sira” Sancho Alves Nahac Informa.
Diretor Eskola Sekundaria Jeral Publika Suai (ESJP) Francelino Freitas Carvalho sente orgulho no apresia ba RCCT ho Parseiru sira nebe fasilita ona Estudante na’in 10, no Diretor ne’e konsidera Estudante na;in 10 ne’e hanesan Rekursu di’ak ida iha Eskola refere, tanba dadaun ne’e Eskola ne’e rasik iha ona website atu Publika informasaun konaba atividades Eskola nian.
” Ha’u sente orgullu tanba Eskola rasik Produs ona ninia rekursu iha area jornalismu ninian, tanba agora estabelesimentu media Eskola ninian, entaun agora ami iha ona Rekursu para atu halo Jestaun media Eskola ninian, nebe Eskola sei uja sira para oinsa maka ami nia website ne’e funsiona ho diak liu tan” Francelino dehan.
Representante Inan Aman Justina da Silva sente Kontente no nia promesa sei kontinua suporta oan sira hodi nune’e bele aprende di’ak liu tan iha Futuru.
Estudante hirak ne’e tuir formasaun durante Fulan tolu no Estagiu Fulan Tolu iha RCCT nebe Parseiru ho ARKTL ho UNESCO.
Entertantu Distribui Sertifikadu ne’e realiza Salaun Eskola Sekundaria Jeral Publika Suai ne’ebe hetan partisipasaun husi Presidente ARKTL, Gestor Radio Cova Taroman, Inan Aman no Partisipa maximu husi Professor/a no Estudante iha Eskola refere.
Jornalísta : Tynho Gusmão
Editor : Chamot Nahac
