Covalima (RCCT) 10-12-21, Ema deskoñesidu harahun vidru janela Centro Evakuasaun Dezastre Municipio Covalima ne’ebé lokaliza iha Resinto Eskola Sekundariu Geral Públika Suai (ESGP).
Ba Jornalista sira Ananias de Araújo hanesan Guarda, iha nia intervista informa akontesimentu ema tuda vidru janela ne’e iha Sesta-Feira ohin madrugada mais ou menus tuku 4:41 Otl, bainhira nia toba hela iha Salaun laran derpente vidru tarutu, nia halai sai hare ema barak maka halai, maibe nia parte la koñese ema hirak ne’e.
“Hori kalan ha’u toba iha ne’e, entaun ohin madrugada tuku 4:41 ema lori fatuk tuda vidru entaun ha’u hakfodak hader sai ba liur ema halai tiha ona, ne’ebé ha’u hare ema barak, se la sala na’in Sanulu resin, sira ne’e husi kraik ne’e maka sai mai pois tuda tiha halai fali ba leten parte jalan tol” Guarda ne’e informa kronolojia ba Jornalista sira iha Salaun ESGP Suai.
Relasiona ho akontesimentu ne’e Diretór ESGP Suai Franselino Freitas Carvalho, deskontente tanba obra ne’ebé furak hari husi koperasaun entre ESGP ho MSSI, maibe derpente deit ema deskoñesidu harahun vidru janela Centro Evakuasaun Dezastre Municipio Covalima.
” Ha’u sente deskontente tanba obra ne’ebé maka furak liu husi koperasaun entre ESGP Suai ho MSSI halo, derpente deit ema deskoñesidu harahun vidru ne’e, depois ami Eskola la iha fundus ruma atu troka fali sasan hirak ne’e, ne’ebé ha’u sente triste tebes” Diretór ne’e informa iha Salaun ESGP.
Tuir informasaun ne’ebé Diretór ESGP Suai hetan katak iha mos Serimónia divertimentu ida iha Aldeia Tali-Oan konaba Verifikasaun Dadus Veteranus ni’an, tanba ne’e deskonfia Juven sira fila husi Festa refere maka tuda ka harahun vidru janela ne’e.
Enkuantu iha Eskola ne’e guarda na’in rua maka hala’o k’naar hodi fo Seguransa ba area Eskola ne’e, tanba ne’e Diretór Eskola sei bolu Guarda na’in rua ne’e, hodi fo atensaun hodi nune’e bele fo Seguransa maximu iha Eskola refere.
Entretantu Centru Evakuasaun ne’e Partense ba Dirasaun Dezastre Municipio Covalima, ne’ebe hari iha Area ESGP nian, no to’o Informasaun ne’e Hatun Jornalista seidauk halo Konfirmasaun ho Dirasaun Risku Dezastre Municipal hodi fo Komentario ba Asuntu ne’e.
Jornalista : Tynho Gusmão
Editór : Chamot Nahac
