Covalima (RCCT) 10-08-21, Konselhu Veteranus Municipio Covalima hahu halo verifikasaun dadus ba kandidatus Veteranus iha Suco Laktos Postu Administrativu Fohorem hamutuk ema na’in 302 nebe regista iha tinan 2009.
Ba Jornalísta sira Representante Veteranos Municipio Covalima ba Konsellu Nasional Veteranus hanesan mos Xefe Ekípa ba Verifikasaun dadus tinan 2009, Francisco Doutel Sarmento ho kódigu “La Mesak” hateten, iha Municipio Covalima Kandidatus Veteranus hamutuk 9600 resin maka sei halo verifikasaun, maibe antes ne’e Ekípa verifika ona dadus hamutuk 500 resin iha Suco Dato-Tolu.
“ Iha Dato-Tolu horiseik (09-08) remata ne’e hamutuk ema atus lima resin (500 resin) depois iha Municipio Covalima ne’e ema hamutuk rihun sia atus ne’en resin (9600 resin) maka ami mai atu halo verifikasaun ” La Mesak dehan.
Francisco Doutel Sarmento ho kódigu “La Mesak” informa, rezultadu husi verifikasaun ne’e Ministériu Asuntu Kombatentes Libertasaun Nasional maka sei analiza hodi fo sai rejultadu.
“ Ami mai ne’e foti sira nia deklarasaun atu aprova ou la aprova ne’e iha baze legal husi nasional iha Ministériu Asuntu Kombatentes ne’e maka foin bele hare iha neba, depois mos ami sei tur hamutuk hodi halo avaliasaun kona ba hira maka aprova no hira maka la aprova, depois hira maka ho durasaun 0 á 3, 4 á 7 no 8 á 14 ” La Mesak Esplika.
Iha fatin hanesan Representante Falintil Regiaun IV Assistente Polítika Militar Atual Presidente Konsellu Veteranus Municipio Ainaro Julio da Conseição ho kódigu “Loro Mesak” husu ba Kandidatus Veteranus sira atu la bele tauk no moe, hodi bele konta kona ba kontribuisaun nebe halo iha luta ba Libertasaun nia laran.
“ Ha’u husu ba ha’u nia inan no aman sira, labele tauk labele moe atu ko’alia, hatete mai saida maka imi halo durante tempo Indonésia nian, kuandu imi tauk imi maka lakon, ami atu defende ita bo’ot sira nia ema, hodi hare ida nebe maka halo dehan halo, ida nebe maka lae dehan lae, keta halo ba uluk balu tiru hasoru fali ami mos dehan Veteranu fali, ida ne’e hau la simu, maibe ema hansane agora barak, maibe ema ida ho nia istória rasik ” Loro Mesak dehan.
Iha fatin nebe hanesan Sekretariu Nurep Jose Morais de Jesus ho kódigu “Vida at Restu” konsidera Kandidatus verifikasaun hamutuk 302 iha Suco Laktos ne’e maioria inklina iha Rede Klandestina.
“ Iha Suco ne’e rasik kandidatu atu halo verifikasaun hamutuk atus tolu rua (302), maibe depende ba sira nia ko’alia deit, karik nia dedikasaun ne’e makas entaun nia bele 8 á 14, maibe ha’u konsidera katak total husi ema atus tolu rua ne’e maioria inklina hotu iha Rede Klandestina ” Vida at Restu informa.
Entertantu verifikasaun dadus iha Suco Laktos ne’e sei halo durante durante Semana ida, no observasaun Jornalísta RCCT iha terrenu hatudu, molok hahu halo verifikasaun, Ekipa Verifikador ba kari aifunan iha Monumentu Masakre de Rai-Ulu 12 de Setembru 1999, depois kontinua hakat ba tenda iha Sede Suco Laktos nia oin, hodi halo Juramentu ba Bandeira Repúblika Demokrátika Timor-Leste ho Bandeira Falintil.
Jornalísta : Tynho Gusmão
Editor : Chamot Nahac
