Covalima (RCCT) 29-12-21, Eletrisidade de Timor Leste Empreza Públika (EDTL,EP) iha Munisipiu Covalima halo ona re-instala Kontadór Hamutuk rihun ida atus lima (1500) ba Kliente sira iha Postu Administrativu Suai.
Ba Jornalista sira Supervisor EDTL,EP Munisipiu Covalima António Mali haktuir iha Postu Administrativu Suai Suco Beco maka seidauk halo instalasaun, maibe Suco seluk remata ona.
“EDTL Empreza Públika hahu instala Kontador ba klientes hotu, ne’ebé hahu iha Suai Vila maka Unidade Kontadóres hamutuk rihun ida atus lima maka ami instala ona, ne’ebé Suai Vila hela Suco ida maka seidauk, maibe ohin ami nia Ekipa sei to’o iha ne’eba” Supervisor ne’e dehan iha nia kna’ar fatin (29/12).
Supervizor ne’e informa, Kliente sira ne’ebé halo ligasaun ilegal sei multa Dolar Amerikanu $ 36.00, tanba ne’e durante instala Kontadór iha Postu Suai, EDTL,EP Covalima rekolla Rezeita hamutuk Dolar Amerikanu rihun rua ($.2000.00).
“Iha ne’e ami iha sirkular ida katak se maka halo ligasaun ilegal tenke selu dolar tolu nulu resin ne’en ($.36.00), ne’ebé duránte ne’e ami rekolla rezeitas hamutuk dolar rihun rua ($ 2000.00), ida ne’e husi loron 8 Fulan Novembru to agora ne’e” Supervizor António Mali esplika.
Entretantu iha EDTL,EP Munisipiu Covalima Funsionáriu permantente hamutuk 17 no kontratádu hamutuk 14, husi total Funsionáriu Permantente na’in 17 ne’e, na’in 10 hala’o servisu iha Vila, no na’in hitu seluk hala’o servisu iha Postu Administrativu hitu (Maukatar, Fatululik, Fohorem, Fatumea, Tilomar, Zumalai, inklui Suai).
Jornalista : Tynho Gusmão
Editór : Chamot Nahac
