Durante Fulan 3 Kompanha la selu Traballador na’in 18  nebe servisu halo konstrusaun uma ba Isolamento Covid-19 iha Covalima

Covalima (RCCT) 02-08-21, Traballador na’in 18 nebe halo servisu iha Konstrusaun uma ba Isolamentu ba Covid-19 iha Ospital Referal Suai, durante fulan 3 ona kompanha seidauk halo pagamento ba trabalhador sira hahu husi Fulan Maio to’o Julho 2021.

Ba Jornalísta sira representante Traballador Raul da Costa Tilman husi RAEO-Oecusse, nia sente triste tanba Kompanya la selu sira ne’e difikulta nia nessesidade loron-loron nian.

“Ami sente triste, ami mai buka osan ne’e tanba ezisénsia husi nessesidades uma laran nian, maibe kuandu la selu ami hansane ne’e la di’ak, ami nia ferik oan sira atu han saida, ami mos presiza osan, tanba ami mai ne’e buka osan, depois ami servisu tia durante fulan tolu la selu ne’e ami sente la di’ak ” Raul dehan iha nia intervista.

Engkuantu Traballador sira hato’o ona sira preokupasaun ba Kompanha maibe nafatin seidauk halo pagamentu ba sira.

“ Ami hato’o ona ami nia preokupasaun ne’e, maibe sira dehan haruka ami atu hein-hein deit, maibe to’o agora mos la selu ami, mais ou menus sira esplika netik mai ami osan ne’e tarde ga oinsa para ami bele hatene ” Raul informa.

Raul esplika, Trabalhador hamutuk 18 nebe kompostu husi Badaen Na’in 7 no Ajudante (Pembantu) na’in 11, no tuir kontratu Badaen iha $10.00 to’o $ 15.00 kada loron no Ajudante (Pembantu) kada Loron $ 6.00.

“ iha ne’e Badaen hamutuk na’in 7, no pembantu ka ajudante ne’e hamutuk na’in 11, depois tuir kontratu ne’e Pemabantu iha $.600 badaen ne’e iha klarifikasaun tolu, $ 10.00, $ 12.50 sen, to’o $ 15.00 ” Raul dehan.

To’o Notisias ne’e hatun jornalísta sira seidauk asessu informasaun husi Diretor Kompanha Roman Junior Unipessoal Lda, tanba laiha fatin refere no bainhira Jornalísta halo kontaktu liu husi via telefone maibe la atende.

Entertanto Konstrusaun uma ba Isolamentu ba Covid-19 iha Ospital Referal Suai hahu iha Loron 24 Fulan Setembru 2020 no sei remata iha Loron 23 Fulan Dezembru 2020 maibe dadaun ne’e ne’e obra ne’e seidauk remata, no tuir iha kuadro kontrusaun ne’e valor Orsamento hamutuk $ 262, 452.00.

Jornalísta : Tynho Gusmão
Editor       : Chamot Nahac