Covalima (RCCT) 17-05-21 Relasiona ho número Kazu Positivu Covid-19 nebe sa’e maka’as iha Municipio Covalima, maka Segunda Feira ohin (17-05) Ekípa SIJK Municipio Covalima konvoka reuniaun iha Edífisio Administrasaun Municipio Covalima, hodi deside hapara akitividades sira hotu iha Municipio Covalima,
Hafoin remata reuniaun, ba Jornalísta sira, Comandante PNTL Municipio Covalima, Super-Intendente Antonio Maria de Sá informa, ba dadaun ne’e Municipio Covalima detekta ona Cluster ba positivu Covid-19 hamutuk 10, tanba ne’e ho objetivo reuniaun ne’e, atu buka solusaun hodi regulariza regras nebe maka durante ne’e la’o, ho rajaun ida ne’e la autoriza Komunidade sira atu halo viajem ba Municipio Dili, inklui labele halo movimentu husi Posto ida ba Posto Seluk iha Municipio Covalima
“ Agora dadaun ne’e iha ita Municipio Covalima deteta ona Cluster 10 ba kazu positivu Covid-19, tanba ne’e maka ami nia objetivo enkontru ne’e, atu buka solusaun hodi regulariza regra nebe maka la’o, tanba ne’e ema labele halo sirkulasaun husi Suai ba DIli, inklui husi Posto Administrativo ida ba Posto Administrativu seluk, nebe sei rigor uitoan iha kestaun seguransa nian iha Covalima” dehan Komandante Antonio
Nia hatutan, Ekípa Taskforce forma ona husi Suco, tanba ne’e nia husu ba Xefe Suco no Xefe Aldeia sira, atu halo sosializasaun ba komunidade sira atu tur hakmatek iha uma no labele halo movimentu sai ba mai.
“ Ekípa Taskforce sira forma ona iha Suco, tanba ne’e sira tenke halo sosializasaun ba ita nia komunidade sira, atu sira tenke tur hakmatek iha uma, labele halo movimentu sai ba mai, ida-dak tenke auto-kuarentina nia an iha sira nia uma ” Tenik Nia
Iha fatin ne’e, Administrador Municipio Covalima Francisco de Andrade informa, nia parte sei hasai karta Sirkular ida hodi hapara aktividades hotu iha Covalima, nune’e mos produs karta ou Guia de marsa sei fo deit ba ema nebe atu hola sembako (nesesidade bazikus) hodi garante Ekonómia rai laran labele mate.
“ Ha’u sei hasai regular ida atu hapara aktividades sira iha Covalima, tanba número Kazu Positivu ne’e sa’e makas, depois Guia de Marsa ha’u sei la tolera tan, so ema nebe maka atu hola sembako, tanba ekonómia iha rai laran labele mate, maibe ida nebe maka rajaun atu vijita familia ka seluk ne’e ha’u sei la atende tan ” katak Andrade
Administrador Covalima mos deklara, sei konfirma ho Amo Pároku, Parokia Nossa Senhora de Fatima Suai, atu hapara aktividades Missa, tanba halibur ema barak.
“ Hau sei hasoru ita nia Amo, atu nune’e husu konsiensia atu hapara lai aktividades missa ne’e, tanba iha ita nia Covalima ne’e detekta ona Cluster 10, tanba hapara lai missa ne’e” Administrador Municipio ne’e hakotu.
Ekípa Kobertura RCCT
Edítor : Chamot Nahac
