Covalima (RCCT) 15-07-21 Durante ne’e Covalima seidauk hetan transportasaun Vasina Sinovac husi Nasional mai iha Municipio Covalima, tanba la iha Lista klaru ba Komunidade sira nebe maka hakarak atu simu Vasina Sinovac.
Tuir Diretor Servisu Saúde Municipio Covalima Filipe Pereira Lemos haktuir, dadaun ne’e Vasina Sinovac seidauk bele transporta mai Muniscipio, tanba tuir Inumerasaun nebe halo iha terrenu, seidauk identifika dadus ba ema nebe atu simu Vasina Sinovaks.
“Los duni iha Komunidade balun maka hakarak simu vasina Sinovac, maibe momentu ekipa halo Inumerasaun iha terrenu ne’e la iha Komunidade ida maka hakarak simu Vasina Sinovac, nebe la’os iha Covalima deit Municipio hotu-hotu seidauk simu sinovac, tamba ne’e maka sinovac ne’e iha Municipio Dili deit ” Esplika Diretor Servisu Saude Covalima FIlipe Perreira Lemos
Diretor Filepe dehan durante ne’e iha Municipio Covalima implementa deit Vasina AstraZeneka (Covac), no Astrazeneka (Aus).
“ Agora dadaun ne’e ita Implementa deit AstraZeneka Covac ne’e uluk ba Linha Frente sira, depois ba ema tinan 60 ba leten ho sira nebe maka Comorbiliti ho ema nebe hakarak simu rasik ne’e agora dadaun ita uja AstraZeneka Australia ” Diretor ne esplika.
Diretor ne’e dehan bainhira identifika dadus ba ema nebe hakarak atu simu Vasina Sinovac, Servisu Saúde Municipio Covalima sei halo pedidu ba Nasional, hodi nune’e bele transporta Vasina Sinovac mai iha Municipio.
“Sim balu hakarak simu Sinovac maibe ita sedauk iha Lista, bainhria ba oin maka ita identifika dadus ba sira nebe maka hakarak simu Sinovaks ne’e ita bele halo pedidu ba Nasional, atu nune’e sira bele lori mai iha Munisipio” Diretor ne’e dehan.
Engkuanto dadaun ne’e iha Municipio Covalima, tuir Inumerasaun, númeru ema nebe atu simu vasina, hamutuk 10.977, no dadaun ne’e atinji ona 10.200 resin, husi total ne’e kompostu husi ema idade 60 ba leten ho Komorbiliti, no linha frente sira.
Jornalísta : Tynho Gusmão & Aje Ferreia
Editór : Chamot Nahac
