Covalima ( RCCT ) 21-06-21 Conselho Veteranus Municipio Covalima iha loron 24-06-21, sei halo levantamentu dadus ba ema sira nebe mate iha masakre iha Aldeia Pelet, Suco Lour Posto Administrativu Zumalai nebe mate iha 1984 liu ba .
Iha hasoru malu ho Komandante PNTL ne’e Vice Prezidente Conselho Veteranus Municipio Covalima Ojorio Soares ho naran kodigu Mau Soko hateten objectivu husi soromutu ne’e atu kordena ho Komandante PNTL Municipio Covalima hodi ko’alia konaba atu rekolha dadus Martires sira iha Covalima liu liu iha Bulo Suco Lour.
“ Ami mai kordena ho Komandante PNTL Municipio konaba 24-06-21 atu ba iha Aldeia Pelet Suco Lour Posto Administrativu Zumalai atu halo levantamentu dadus ba Martires nain Rua nulu resin lima ( 25 ) nebe mate no maluk feto sira balu ema perkosa iha fatin neba iha tinan rihun ida atus sia walu nulu resin haat ( 1984 ) iha Pelet Suco Lour Posto Administrativo Zumalai.” Informa Vice Prezidente Veteranos Municipio Covalima Ojorio Soares Kodigo Mau Soko ba RCCT Segunda ohin.
Vice Prezidente Konselhu Veteranus ne’e afirma hafoin levaramentu dadus ba martires hirak ne’e Konsellu Veteranu sei halo proposta ba Conselho Keteranus da Libertasaun Nasional hodi hari monumentu ba fatin masakre sira nebe mak sei dauk iha monumentu .
“Bainhira ami atu halo Monumentu ruma mos bazeia ba orientasaun husi Nasional tamba ne’e ami Konselhu iha Municipio sei rekolha dadus ba ema mate ne’e nain hira, ema nebe fo sasin ne’e los ka la’e rekolha buat sira ne’e hotu mak ami sei halo Proposta ba Governu para halo monument bo’ot ida iha fatin akontesementu refere.” Katak Mau Soko
Mau Soko Mos informas Konsellu Veteranu Covalima Sei dauk foti dadus ba Vitima nebe Sofre iha Momentu Difisil durante tempo luta ba Libertasaun Timor Leste.
“Oras ne’e husi konselhu veteranus sei dauk foti dadus ba vitima sira nebe sofre iha momentu neba, Vitima sira hanesan iha Pelet Suco Lour, Posto Zumalai, Massakre 06 de Setembro, iha Massakre nikir Posto Tilomar, Massakre Suco Lactos no iha fatin seluk seluk tan ” Tenik Vice Prezidente Veteranos Municipio Covalima Ojorio Soares Kodigo Mau Soko iha Komando PNTL Covalima hafoin remata engkotru ho Komandante PNTL Covalima
Entertanto iha intervista ne’e Vice Prezidente konselhu veteranus Municipio Covalima Ojorio Soares Kodigo Mau Soko hateten martires da libertasaun sira nebe mate iha tinan rihun ida atus sia hitu nulu resin lima ( 1975 ) to’o tinan rihun ida atus sia sia nulu resin sia ( 1999 ) ne’e balu nia osan familia sira simu ona no ba lu mak sei dauk tanba sei iha prosesu hela nia laran .
Jornalista : Saturnino Soares
Edito : Chamot Nahac
