Coliati-Meta Malik Partisipa iha Serimónia Funebre Saudozu “Sesurai”

Ministru Asunto Kombatente Libertasaun Nasional (MAKLN) Julio Sarmento da Costa “Meta Malik” Partisipa serimónia funebre ba”Saudozu Sesurai” Foto RCCT/Tynho Gusmão

Covalima (RCCT) 20-11-21, Xefe Estadu Maior FALINTIL Forsa Defeza de Timor-Leste, Brigadeiru General Calisto Santos “COLIATI” no Ministru Assuntu Kombatente Libertasaun Nasional (MAKLN) Julio Sarmento da Costa “Meta Malik” partisipa iha serimónia Funebre Saudozu Alvaro do Nascimento “Sesurai” iha Aldeia Tabakolot Suco Debos Postu Administrativu Suai Sesta-Feira ohin (19/11).

Saudozu Sesurai hatudu ezemplu ne’ebé di’ak ba Jerasaun foun sira tanba iha domin ba Povu no Nasaun hodi partisipa kontribui no maka’as iha prosessu Luta Libertasaun Nasional durante tinan naruk.
“Ita nia Saudozu iha nia vida tomak nia entrega an tomak ba prosesu Libertasaun Nasional, ema ne’ebe iha domin ba Povu no Nasaun ida ne’e, ne’ebe ita nia Saudozu sai ezemplu bo’ot ida ba Jerasaun foun sira, tanba ne’e Jerasaun foun tenke kontribui paz no estabilidade atu nune’e politiku na’in sira bele iha planu dezenvolvimentu di’ak hodi fo resposta ba Funu naruk ne’ebe liu tiha ona” Xefe Rejiaun IV atual Xefe Estadu Maior FALINTIL Forsa Defeza de Timor-Leste, Brigadeiru General Calisto Santos “Coliati” hateten bainhira partisipa iha Serimónia funebre ba Saudozu “Sesurai” iha Suco Debos.

Ministru Assuntu Kombatente Libertasaun Nasional (MAKLN) Julio Saremento da Costa “Meta Malik” hanoin hikas mensajem Saudozu Sesurai katak “di’ak ba Covalima halo deit Lalika tauk” tanba ne’e konsidera Saudozu Sesurai hanesan Fini di’ak ida ne’ebe brani hodi luta liu-liu iha rai Covalima.

Iha fatin tristeza ida ne’e hau hanoin ninia mensajem katak “halo diak ba Covalima halo deit lalika tauk” mensajem ne’ebe simples maske nia isin mate la iha ona, atu ita oinsa bele banati tuir liu-liu ba Jerasaun foun sira, agradese ba Uma lisan Puh Gewen ne’ebe hetan fini di’ak ida ne’ebe brani hodi tur iha rai Covalima” Meta Malik dehan.

Molok halo halo Serimónia Funebre ba Saudozu “Sesurai”, Povu Covalima hamutuk ho Veteranus no familia sira Selebra misa Funebre ba Saudozu “Sesurai” iha Igreja Ave Maria Suai ne’ebé prejidi husi Pe.Sebastião Eugenio da Cruz Correia no Partisipa husi Ministru Assuntu Kombatente Libertasaun Nasional (MAKLN), Brigadeiru General Calisto Santos “COLIATI” inklui Autoridade sira iha Municipiu Covalima
Entretantu hafoin remata misa Funebre, Kontinua halo translasaun mate isin Saudozu “Sesurai” hodi halo Serimónia Funebre iha nia rezidensia tuir lisan Militar hodi tiru kilat molok kaisaun tun ba rai okos.
Jornalísta : Tynho Gusmão
Editor.       : Chamot Nahac