Covalima ( RCCT ) 08-12-21, Centru Nasional Chega (CNC) Lansa Muzeum iha Municipio Covalima, atu Rai Istoria Memoria luta nian husi Tinan 1975 to’o Tinan 1999.
Iha lansamentu Muzeum Municipal Covalima ne’e Diretór Ezekutivu CNC Hugo Fernandes Halore iha diskursu temi sai CNC hari’i Muzeum iha Covalima ho objetivu atu fasilita luta na’in hodi asesu sira nia Istoria Memoria no mos Fasilita Jersaun foun sira atu hatene konaba Memoria Passadu iha Muzeum ne’e.
“Wainhira halo planu ba tinan ida ne’e ha’u hateten ba kolega sira iha Centro Chega dehan, ha’u hakarak hari Muzeum Memorial ida iha Municipio sira no ita hahu iha Municipio Covalima, ne’e ideia ida ne’ebé mak ohin lori ita mai hari’i Muzeum Memorial iha Municipio Covalima la’os tamba Istoria luta ba ema bo’ot sira nian deit, la’os tamba luta grupu ida nian deit, maibe atu fasilit oinsa mak ema luta na’in babain sira bele asesu sira nia Memorial nune’e Jerasaun foun sira bele aprende konaba Memoria passadu, ida ne’e mak hanesan esensial tebes, ho ida ne’e mak Centro Chega iha tinan ida ne’e ko’alia ho Administrador Municipio oin sa mak realiza mehi ida ne’e ” Diretór Ezekutivu CNC Hugo Fernandes Halore iha Masakre Setembru Negro Tersa Feira (07/12).
Diretór Ezekutivu CNC hatutan , Muzeum hanesan fatin ida konfrontasaun ideia no kontextasaun planu atu tau historia memorial luta nian.
“ Ohin ita akonpaña konversa ho maun bo’ot Veteranu sira iha ne’e konta historia barak tempu luta nian, ida ne’e mak sai hanesan dezafius ida iha Muzeum ida nian, Muzeum hanesan fatin ida konfrontasaun ideia no kontextasaun planu, karik Muzeum la sai fatin ida hanesan ne’e Muzeum sai mate, Memorial ida tenke moris wainhira iha konfrontasaun ideia no kontextasaun Istoria, ita harii Memorial ida maibe tinan ida mak ita mai ne’e la iha signifikante, ita halo memoria ne’e atu moris liu husi aprezentasaun teatru konaba luta no diskusoens sira konaba luta nian hanesan ne’e Muzeum bele moris ” Tenik Diretór Ezekutivu CNC iha nia deskursu.
Enkuantu iha fatin hanesan Prezidenti komisaun organizadora ba Lansamentu Muzeum Municipal Covalima Elizio Gusmão “ Sabelay”, Agradese ba CNC, Conselho Municipal Combatentes Libertasaun Nasional, PNTL Covalima, parte hotu nia kolaborasaun no servisu hamutuk mak bele realiza atividade lansamentu Muzeum Municipal ho susesu.
“ Hanesan komisaun organizadora ba atividade Lansamentu Muzeum Memoria iha Covalima hasoru obstakulu oin oin antes atu realiza atividade maibe ho Grasa Na’i Maromak nian liu husi ita bo’ot sira nia tulun liu liu parte sira hanesan CNC, Conselho Municipal Combatentes Libertasaun Nasional, PNTL Covalima, no mos familia Martir sira, familia Sobrevivente sira no estudante hotu hotu nia kolaborasaun no servisu hamutuk mak ita bele realiza atividade lansamentu ne’e ho susesu ” Prezidente Komisaun Organizadora Elizio Gusmão “ Sabelay ”
Entertantu relasiona ho Estabelesementu Muzeum Municipal iha Covalima ne’e,
Diretór Ezekutivu CNC Hugo Fernandes, husu ba Veteranu no Veterana iha Covalima atu ida idak hahu hakerek ona nia Istoria luta nian hahu husi tinan 1975 to’o 1999 nune’e bele Rai Istoria ne’e iha Muzeum Covalima ba jerasaun foun sira hodi hatene Istoria Passadu.
Jornalista : Saturnino Soares
Editor : Chamot Nahac
