CCC Kapasita Juven Feto-Delegada Suco ho Parseru konaba Hamenus Risku Konflitu iha Uma Laran

Fasilitadora ba Programa Programa Dezenvolvimentu Feto Rural (PDFR), Teresa Maia Monis, Wainhira Halo Intervista ho jornalista RCCT iha Resinto CCC, Tersa Feira 23/11/21- Foto/Ansa Nunes

Covalima (RCCT) 23-11-21, Centro Comunidade Covalima (CCC) hala’o formasaun ba delegada no Juven Feto ho sira nia Parseiru ka la’en husi Suco hat (4), Suco Matai, Ogues, Kamenasa no Suco Suai Loro hodi hasa’e koñesimentu konaba Igualdade Jeneru.

Fasilitadora ba Programa Programa Dezenvolvimentu Feto Rural (PDFR), Teresa Maia Monis, hateten formasaun ba delegada no Juven Feto Suco ho sira Parseiru ka la’en ne’e atu hasa’e koñesimentu hodi hamenus risku ba Konflitu iha Uma Laran.

Formasaun ba delegada no Juven Feto Suco ho sira nia parseiru, atu hasa’e sira nia koñesimentu konaba igualdade Jeneru atu nune’e sira bele implementa igualdade Jeneru konaba k’naar no responsabilidade atu sira bele hamenus risku nebe hamosu konflitu iha uma laran” Dehan Fasilitadora ba programa Programa Dezenvolvimentu Feto Rural (PDFR) Teresa Maia Monis.

Iha fatin hanesan partisipante Foramsaun delegada husi Suco Matai, Elsa Barreto Amaral Afirma liu husi Formasaun ne’e bele haklean Matenek kona ba Informasaun nebe ligadu ho Violensia Bazeia ba Jeneru ne’ebé Akontese iha Uma Laran.

Durante loron rua ha’u tuir ona formasaun ne’e senti kontenti tebes tanba atu hatene klean liu tan konaba Violensia ne’ebé bazeia ba Jeneru liliu konaba tipu Violensia sira ne’ebé akontese iha familia uma laran, Violensia Domestika, Krimi Publiku no mos hatene kona ba oinsa mak feto ho mane sira nia servisu hamutuk hodi bele fahe tempu ba malu no bele komprende malu iha situasaun saida deit” Hateten Elsa Bareto Amaral.

Entretantu Partisipante iha formasaun ne’e mai husi Suco 4 iha Postu Administrativu 2, hanesan Postu Administrativu Maukatar no Postu Administrativu Suai, total partisipante hamutuk ema na’in haat nulu resin hat (44) no Formasaun ne’e hala’o durante loron 3, hahu Segunda Feira Dia 22 to’o Kuata Feira 24 de Novembru 2021.

Jornalista : Aliansa Serfina

Editor      : Chamot Nahac