Covalima (RCCT) 04-08-21, Centro Comunidade Covalima (CCC) halo parseiru ho Give2 Asia-America no Belun ho Suai/Covalima hodi fo hapoio ba Komunidade Vulneravel nebe afeta ba Covid 19 iha Timor Leste liu-liu Komunidade iha Municipio Covalima, tanba ne’e CCC halo lansamento distribuisaun Ai han iha Aldeia Fatuloro, Suco Taroman Postu Administrativu Fatululik.
Koalia ba Jornalista sira Diretor CCC Alberto de Jesus hateten, Objetivu lansamentu ne’e maka atu fo tulun Familia Vulneravel sira iha area remotas, nebe maka labele la’o ba fatin dok, no impaktu husi Covid-19 nebe durante ne’e sira enfrenta.
” Objetivo husi lansamentu ne’e ita atu tulun Komunidade Vulneravel sira nebe maka dok husi kapital Municipio, hanesan ferik sira nebe maka labele lao dok ona, liga ho Situasaun Covid 19 ne’ebe Sira enfrenta “ Alberto dehan.
Diretor CCC ne’e mos esplika, Distribuisaun Ai han basiku ne’e, CCC hetan fundus husi Give2 Asia ho montante $ 10.117,59 no mos Belun ho Suai/Covalima iha Portphilips Australia ho montante $ 2.471 no Apoio ne’e sei fo ba total Benefisiarius hamotuk Familia Vul 220 nebe kompostu husi Aldeia 43 iha Postu administrativu 3 (Fatululik, Tilomar, Fatumea).
” Programa distribuisaun ne’e mai husi Fatin rua, ida mai husi donor ida Give2 to Asia ho montante $ 10.117,59 nomos Belun ho Suai/Covalima ho montante $ 2.471 ne’ebe total Benefisiarius iha Postu tolu ne’e hamutuk 220, ne’e kada Aldeia na’in 5 deit ” Alberto Informa.
Benefisiaria Rezina da Conceição idade 60 resin, agradese ba Centro Comunidade Covalima nebe fo apoio ba aihan basiku ba sira hodi bele hatutan sira nia moris loro loron nian.
” Ami ferik ne’e Kontente, tanba ami la’o labele ona, imi mai fahe fo ami hanesan ne’e ami kontente no agradese ba imi” Rezina ho Kontente dehan.
Iha Postu Fatululik total Benefisiarius hamutuk 45, no sasan ne’ebe CCC distribui maka hanesan Fos, Bimoli, supermi, foremungu, no Susu ben.
Engkuanto Centru Comunidade Covalima distribui deit aihan basika iha area implementasaun programa nebe durante CCC hala’o ba, tanba ne’e CCC seidauk iha hanoin ruma atu kobre Postu nebe maka La’os area implementasaun Programa.
Entertanto iha lansamento ne’e partisipa husi Administrador Municipio Covalima, Segundo Komandante PNTL Municipio Covalima, Xefe Suco no Xefe Aldeia inklui Komunidade sira.
Jornalista : Tynho Gusmao
Editor : Chamot Nahac
