CAC Halo Sosializasaun Lei Kombate Korupsaun Iha Covalima

Covalima (RCCT) 25-08-21, Comição Anti Corupção (CAC) halo sosializasaun ba Lei Númeru 7/2020, 26 de Agostu, kona ba medidas prevensaun kombate korupsaun nian ba Agênsia Públika sira ne’ebe ezerse funsaun nudar Diretor nebe eziste iha Municipio Covalima.

Ba Jornalísta sira Komisáriu Adjuntu Investigasaun CAC Augusto da Costa Castro iha intervista hateten, sosializasaun ne’e halo atu bele hasa’e sira nia koñesimentu ba aplikasaun Lei nebe iha, tanba divulgasaun ba Lei medidas prevensaun kombate korupsaun regula medidas lubuk ida, nebe hahu husi prevensaun nebe espesial liu ba rezime deklarasaun bens no interese ba kargu xefia diresaun sira, no mos iha parte kriminalizasaun ba iha setor privadu sira.

“ Ohin ami mai iha ne’e atu hala’o sosializasaun ba Lei Númeru 7/2020, 26 de Agostu kona ba medidas prevensaun kombate korupsaun nian ba Agênsia Públika sira nebe ezerse funsaun nudar Diretor nebe eziste iha Municipio Covalima, divulgasaun ba Lei medidas prevensaun e kombate korupsaun iha neba regula medidas lubuk ida, hahu husi prevensaun nebe espesial liu ba iha rezime deklarasaun bens no intereses ba kargu xefia diresaun sira, nomos funsionárius sira iha Covalima, depois kona ba medidas balun iha parte kriminalizasaun nian liu-liu iha setor privadu sira, tanba ne’e maka ita halo ida ne’e para sira bele iha koñesimentu konaba lei ne’e ” Komisáriu Augusto haktuir.

Iha fatin ne’e Sekretáriu Administrador Municipio Covalima Afonsu Nuguera Nahak informa, benefísiu husi sosializasaun ba lei medidas prevensaun kombate korupsaun ba kargu Xefia, Funsionárius no Emprezárius sira, atu bele hadok an husi korupsaun nebe buras hela iha rai ne’e.

“ Benefisiu ba sosializasaun ba Lei Númeru 7/2020 kona ba medidas prevensaun kombate korupsaun atu haklean informasaun ba kargu Diresaun, Xefia, Funsionárius no Emprezárius sira atu bele hadok an husi korupsaun nebe maka la’o hela iha rai ida ne’e ” Nugoera dehan.

Lei ne’e kompresivu hahu husi medidas prevensaun to’o aplikasau no sansaun disiplinar ba ema nebe viola lei ida ne’e.

nune’e Sosializasaun ba Lei medidas prevensaun kombate korupsaun ne’e realiza iha Salaun Administrasaun Municipio Covalima, no partisipa husi Diretor linhas Sektorais sira ne’ebe existe iha Municipio Covalima, inklui Funsionárius sira.

Jornalísta : Tynho Gusmão
Editor       : Chamot Nahac