Covalima (RCCT) 17-08-21, Organizasaun ba Ema ho Difisiensia, Raes Hadomi Timor Oan (RHTO) fo treinamentu ba nia parseiro sira iha Municipio Covalima ho nia objetivu atu hasa’e lideransa no autoridade lokal sira nia konesementu iha area dezastre no mos asunto difisiensia.
Tuir Programa officer Disability Partnership Human Development ( PHD ) Isau Borges hateten ita labele husik deit ema ho difisiensia iha linha kotuk maibe ita mos tenke involve ema ho difisiensia sira iha programa sira husi sosiedade sivil no programa husi governu nian.
“Ita la bele husik ema ho difisiensia iha kotuk, ita hakarak ema ho difisiensia ne’e partisipa iha kualker atividade no programa sira husi sosiedade sivil no programa husi Ministerio relevante sira, ho ida ne’e ami nia prezensa atu hatutan informasaun kona ba asunto Difisiensia no Risco Dezastre ba lideransa no autoridade lokal sira atu nune’e ita nia ema ho difisiensia bele hatene sira nia diretu rasik.” Program Officer PHD Isau Borges Informa ba Jornalista sira iha Salaun Administrasaun Postu Suai Vila (17-08)
Iha fatin hanesan Manajer Projectu Development Foreign Affairs and Trade (DFAT) Eduardo Tilman hateten RHTO fo apoiu ema ho difisiensia iha Municipio Covalima hamutuk 100 resin, apoiu ne’e mak hanesan halo rampa fo bolsu estudu no seluk tan.
“ Numeru nebe mak RHTO apoiu ema ho difisiensia iha Municipio Covalima hamutuk atus ida resin, nebe mak RHTO apoiu halo rampa, no mos fo bolus estudu, iha referal no mos apoiu emerjensia ruma iha Municipio Covalima ” Katak Eduardo Tilman.
Entretanto treinamentu ne’e hala’o iha Postu Administrativo Suai no remata sei halo fali iha Postu Administrativu Maucatar no Zumalai kona ba asunto difisiensia no redusaun risco dezastre ba Lideransa no Autoridade Lokal sira iha Postu no Suco.
Jornalista : Saturnino Soares
Editor : Chamot Nahac
