Covalima (RCCT) 15-12-21, Hahu Tinan 2011 Servisu Bombeiru destaka iha Munisipiu Covalima maibe seidauk iha Be matan Propriu ka permanente ne’ebé Servisu Bombeiru bele utiliza hodi halo atuasaun ba komunidade sira ne’ebé hetan dezastre Incêndio ka ahi han uma.
Ko’alia ba Jornalista RCCT, Komandante Servisu Bombeiru Munisipiu Covalima Pedro do Carmo hateten Bombeiru iha Munisipiu Covalima durante ne’e Ense Be ba kareta tangki husi Kompaña Privadu Sira selu $10.00 kada Tangki, tanba Bombeiru Covalima seidauk iha Be Matan Propriu ka Permanente atu uja hodi atende Komunidade sira ne’ebé hetan dezastre Incêndio ka ahi han uma.
“ Hahu iha Tinan 2011 Bombeiru destaka iha Munisipiu Covalima to’o agora, tama ona tinan sanulu ba tinan sanulu resin ida Bombeiru Munisipiu Covalima nafatin hasoru difikuldade konaba Be, tanba Be Matan permanente ka Propriu Bombeiru nian seidauk iha, oinsa mak ami bele ajuda komunidade sira hetan dezastre Incêndio ka ahi han uma iha fatin ruma, durante ne’e ami husi Bombeiru uja deit husi Servisu Agua no Saniamentu nia Be sumur, ami husu ajuda husi Kompaña ne’ebé mak iha Be para ami tau iha kareta tangki hodi prepara ba Dezastre ahi han uma ruma iha Covalima, maibe bainhira ami uja Be husi Kompaña privadu ami selu kada kareta tenki ida selu dolar sanulu,” Informa Komandante Bombeiru Pedro do Carmo.
Ho Sasidik ne’e Komandante Bombeiru Covalima hato’o karta pedidu ba iha Komandu Bombeiru Nasional maibe ate agora seidauk iha responde pozitivu.
“Iha Kada fulan no tinan ami husi Bombeiru Munisipiu Covalima halo bebeik karta pedidu ba Komandu Bombeiru Nasional atu halo perfurasaun Be permanente ba Bombeiru Munisipiu Covalima, Bombeiru nia kilat atu salva komunidade sira mak Be se Be la iha oinsa mak ami bele ajuda komunidade sira ne’ebé hetan dezastre Incêndio ka ahi han sira nia uma, maibe karta hirak ne’e ita diriji ba Nasional to’o agora mos la iha responde pozitivu atu halo perfurasaun ida ne’e ba ami Bombeiru sira iha Covalima ” Tenik Comandante Bonbeirus Pedro do Carmo.
Nune’e Lideransa Bombeiru Munisipiu Covalima Pedro do Carmo husu Komandu Jeral Bombeiru Nasional atu halo perfurasaun Be Matan permanente ba Bombeiru iha Covalima nune’e bele utizilasa hodi atende Kazu Incêndio ne’ebé Komunidade sira infrenta iha Covalima.
Jornalist : Saturnino Soares
Editor : Chamot Nahac
