Covalima (RCCT) 03-08-21, Agênsia Nasional Lisensiamentu Ambientál (ANLA) fo formasaun internal ba Funsionárius Meiu Ambiente husi Municipiu lima (5) (Bobonaru, Ermera, Likisa, Ainaru, inklui Covalima) no kada Municipio Funsionárius nain rua maka partisipa iha formasaun ne’e.
Sekretáriu Ezekutivu Agênsia Nasional Lisensiamentu Ambiental António Lelo esplika ba Jornalista Sira, objetivu prinsipal ba formasaun ne’e hanesan planu programa nebe Diresaun Jeral do Ambiente planeia, hodi fo formasaun internal ba Funsionárius Municipal, atu nune’e ba futuru bele envolve sira iha planu orsamental ka planu aktividades.
“ Objetivu prinsipal ba formasaun ida ne’e hanesan planu programa nebe Diresaun Jeral do Ambiente planea, hodi halo formasaun internal ba ami nia Funsionárius Municipal, atu nune’e hahu agora ba oin bele envolve mos ami nia kolega sira iha planu orsamental inklui mos planu actividades sira, atu nune’e sira mos bele sai nain ba planu no actividade ne’ebe maka iha, tamba durante ne’e planu ne’e husi Nasional maka mai hela deit sira rasik la sente ba planu ne’e ” Sekretáriu Ezekutivo ANLA dehan.
Sekretáriu Exekutivu ne’e esplika, matéria nebe maka fo kona ba Alternasaun Klimátika, Biodiversidade, Edukasaun Ambiental, inklui oinsa prosessu Lisensiamentu Ambiental.
“ Matéria husi Diresaun Tékniku sira, maka hanesan Alternasaun Klimátika, Biodiversidade, Edukasaun Ambiental, nomos asuntu importante ida maka oinsa prosessu Lisensiamentu Ambiental, tamba tuir dekretu Lei No.5/2011 katak, kualker aktividade ne’ebe antes atu hahu, tenke trata uluk lisensa ambiente, tamba ne’e maka presiza fo ba kolega sira oinsa maka sira bele kontrola ba aktividades sira ne’ebe maka hetan ona lisensa ” Antonio esplika.
Entertanto formasaun ne’e realiza iha rezidênsia komunidade nian iha Suco Debos (Bairo-Kosta) no formasaun ne’e sei hala’o durante semana ida nebe hahu iha Segunda Feira horiseik (02/08) no sei remata iha loron Sesta Feira (06/08) Semana ne’e.
Jornalísta : Tynho Gusmão
Editor : Chamot Naha
