ANLA Fo Formasaun Ba Emprezáriu Lokál Konaba Métodu trata Lisénsia Ambiente

Covalima (RCCT) 27-08-21, Sekretáriu Estadu Meiu Ambiente liu husi Agênsia Nasional Lisensiamentu Ambientál (ANLA) fo formasaun ba Emprezáriu Lokál sira iha Munisipiu Covalima kona ba mekanísmu oinsa maka na’in ba Kompaña bele trata karta Lisénsiamentu Ambientál.

Sekretáriu Ezekutivu Agensia Nasional Lisensiamentu Ambiental Antonio Lelo iha nia Intervista hateten, tuir dekretu Lei Nu. 5/2011 molok implementa aktividades ekonómiku tenke trata Lisensiamentu Ambiental hodi halo estudu kona ba ninia viabilidade, hafoin bele implementa aktividades.

Iha formasaun ne’e ami esplika kona ba metodu ho mekanismu oinsa maka na’in ba projetu sira bele trata karta lisensia Ambiente, tamba tuir dekretu Lei Numeru 5/2011 ne’e hatete katak molok implementa actividades ekonomiku tenke trata uluk Karta Lisensiamentu, depois liu husi estudu ida hodi hare nia viabilidade ka lae, ne’e maka foin bele hetan lisensia ambiente, tamba ne’e maka ami mai halo formasaun ba sira ” Sekretariu Ezekutivu ne’e dehan.

Nia informa tempu besik Esbosu Lei kona ba taxa ambiente sei haruka ba Konsellu Ministru hodi hetan aprovasaun.

Dadaun ne’e ambiente sei fo lisensa gratuita, iha tempo besik ami nia Esbosu Lei kona ba taxa ambiental ne’e sei haruka ba Konsellu Ministru hodi hetan aprovasaun, se Konsellu Ministru aprova Lei ida ne’e maka hanesan ohin ha’u dehan, ba sira nebe maka halo aktividades ekonómika la iha karta Lisensa Ambiental maka sira sei kona multa ” Antonio Lelo Informa.

Engkuantu iha Munisipiu Covalima tuir dadus provizóriu ba Emprezáriu Lokál sira nebe hetan ona karta Lisensiamentu Ambiental hamutuk 14 kompostu husi Kategoria A, B no C, maibe dadaun ne’e Emprezáriu Lokál iha Covalima hamutuk 25 maka sei iha prosessu atu hetan karta Lisensiamentu.

Nune’e mos formasaun ne’e realiza iha Sexta-Feira ohin iha Salaun Eskola Sekundária Geral Públika de Suai (ESGP) nebe hetan partisipasaun husi Autoridade lokál sira no partisipa máximu husi Emprezáriu Lokál sira iha Covalima.

Jornalísta : Tynho Gusmão

Editor       : Chamot Nahac