Covalima ( RCCT ) 07-06-21, Autoridade Municipio Covalima hamutuk ho Seguransa PNTL Covalima sei tau kontrolo ba animal nebe mak husik livre iha estrada laran husi Posto Administrativo Tilomar Mota Masin To’o Posto Administrativo Zumalai.
Tuir Administrador Municipio Covalima Fransisco Andrade hateten iha ona kordenasaun ho Komandante PNTL Municipio Covalima ho Administrador Posto sira atu hare animal sira nebe mak livre hela iha estrada laran husi Fronteira Salele Tilomar to’o Posto Administrativo Zumalai.
“Ha’u nia hare durante ne’e komunidade sira la iha konsiente atu kuidade ou hare ba ita nia estrada ne’e tamba komunidade sira rasik husik livre animal iha dalan publikusira ne’e, animal sira iha estrada laran ne’e bele difikulta ba ema nebe mak halo viagen ba mai ne’e bele ameasa mos ba ema nia vida ” Dehan Administrador Municipio Covalima Fransisco Andrade Segunda Feira (7-6) iha nia knar fatin.
Administrador Andrade hatutan Estadu lakon osan barak hodi hadi’a estrada ba nia povu atu asesu ba mai, maibe agora ita kompara animal sira hanesan bibi, karau,fahi,asu no seluk tan mak asesu barak liu duke ita ema tanba komunidade sira rasik la iha konsiensia ida nebe mak di’ak atu hakiak animal sira tuir sira nia fatin.
” estadu lakon osan barak maibe komunidade rasik la iha konsiensia di’ak atu hare ba estrada ne’e no sira husik livre fali animal iha fatin publiku sira ne’e ho ida ne’e autoridade Municipio ho Posto sira hamutuk ho seguransa sei halo sosializasaun ba komunidade sira para komunidade sira bele komprende no labele husik animal livre iha estrada publiku, se komunidade sira nafatin la fiar autoridade no siguransa sira entaun sei foti desizaun hodi tiru animal hirak nebe mak komunidade husik livre iha fatin publiku sira hanesan estrada no aeroportu Holbelis.” Tenik Administrador Munisipio Covalima Fransisco Andrade.
Entertanto Administrador Munucipio Fransisco husu ba komunidade sira nebe mak husik sira nia animal livre iha estrada laran agora dadaun halo ona fatin ba animal hirak ne’e antes halo sosializasaun, tanba agora governu dedreta ona lei katak animal labele husik livre iha fatin publiku sira.
Jornalista : Saturnino Soares
Editor :Chamot Nahac
