Covalima (RCCT) 13-07-21, Diresaun Nasional Gestão Risku Desastre Municipio Covalima (DNGRD) hamutuk ho Administrador Municipio Covalima halo lansamento ba distribuisaun material konstrusaun ba Familia vitima ba desastre naturais nebe akontese iha loron 4 fulan Abril liu ba no nsst.
Ko’alia ba Jornalista Coordenador DNGRD Municipio Covalima Dinis Perreira hateten, Benefisiárius iha Covalima hamutuk uma kain 16, kompostu husi Posto Administrativu hitu, no tipo desastre mai husi ahi han uma no anin sobu, Dinis esplika liu tan Ekipa halo ona pagamento ba aikuadradu ho maun de obra ho total orsamento $5264.00.
“Lansamento ohin ne’e ba Posto Maukatar, Suai, Fatululik, Zumalain, sei kontinuasaun ba Tilomar,Fohorem, Fatumea, nebe total benefisiarius ne hamutuk uma kain 16, ida ne’e tipo desastre mai husi ahi han uma, no anin sobu, rai halai, Ekipa halo ona pagamento ba aikuadradu ho maun de obra iha posto hitu ne hamutuk $5264.00 ” Katak Dinis.
Dinis informa, Apoio material konstrusaun ne’e sei hare ba nivel estragus hanesan (a’at kama’an no Estragus total).
“Material konstrusaun ne’e ita hare tuir nivel estragus hanesan aat kaman ne’e sei hetan kalen tahan 50 ho pregu kalen, depois ba ida nebe maka a’at total ne’e sei hetan kalen 50 sementi 25 pregus kalen no ai nian, inklui ho besi beton 8 mili batan 8, no 10 mili 12 batan ” Dinis informa.
Iha lansamento ne’e Administrador Municipio Covalima Francisco de Andrade hateten, sasan nebe maka Governo apoio tuir kbi’it nebe iha, tanba ne’e nia husu ba Benefisiarius sira atu labele fa’an fali matrial nebe hetan husi Governu ne’e.
“Sasan ne’e la’os imi deit maka simu, ema territorio laran ne’e kuase simu hotu, liga ho inundasaun nebe maka akontese iha Fulan abril liu ba, nebe sasan nebe maka Governo apoio ne’e tuir Governo nia kbi’it ne’ebe maka iha, nebe imi labele fa’an fali ba ema seluk, sira husi Ekipa ne’e, depois haruk Xefe Suco sira sei kontrola imi” dehan Administrador Municipio Francisco de Andrade.
Iha fatin hanesan Benefisiarius Luiza Cardoso hateten maske uma nebe maka hetan estragus ona, maibe nia kontenti tan bele hetan material konstrusaun nebe maka Governo apoio hari halo foun uma.
“ Ha’u kontente ho apoio ne’e tamba hau nia uma nebe maka momento ne hetan estragus, maibe ohin sira apoio ona atu nune hau bele halo uma foun ” Benefisiarius Luiza ne’e hakotu.
Jornalísta : Tynho Gusmão
Editor : Chamot Nahac
