Covalima (RCCT) 14-10-21, Hafoin Timor Resources hamotuk ho Autoridade Municipal no Lia Nain sira halo serimonia Kultural ba Perfurasaun mina rai maran iha Covalima, Joventude no Komunidade barak mak ezizi hakarak atu tama servisu hanesan trabalhadores iha perfurasaun mina ne’e.
Iha ninia K’nar Fatin Administrador Municipio Covalima (AMC) esplika tuir observa iha terenu, servisu etapa Perfurasaun ne’e persija deit ema tekniku nebe Espesial iha area perfurasaun.
“ Ema barak ezizi servisu, maibe Tuir ha’u nia observasaun direta iha terenu no katak iha tempu agora husi kompanha presiza dei’t ema nebe tekniku espesial, tanba iha faze perfurasaun mina agora buat hotu uza ho makina tuir esplikasaun nebe ha’u rona husi manager Timor Resources ho Prezidente Autoridade Nasional Petroleu ( ANP ) esplika iha Media Sosial ” AMC Francisco de Andrade esplika.
Tanba ne’e Administrador Munisipio Covalima (AMC) husu ba Juventude sira atu prepara an no prepara Saude di’ak hodi hein Vaga (rekrutamentu) iha faze Explorasaun Mina iha Covalima.
“Ha’u husu ba Joven sira iha Covalima laran, prepara an no prepara imi nia Saude, hafoin perfurasaun mina ne’e hotu, tuir fali etapa explorasaun mina ne’e sei loke vaga ba ema Covalima oan sira atu servisu, maibe difrente servisu ho instituisaun seluk, bainhira liu iha rekrutamentu refere sei tuir formasaun durante fulan ne’e ( 6 ) ou bele mos to’o fulan sia ( 9 ), tuir informasaun nebe mak ha’u rona husi Manager Kompanha no Prezidente Autoridade Nasional Petroleu ( ANP ) nia esplika ” Tenik AMC Francisco de Andrade.
Entretantu tuir Administrador Municipio Francisco de Andrade hateten oras ne’e dadaun Kompanha Internasioanal Timor Resources halo hela perfurasaun mina matan rua ( 2 ) hanesan Mina Matan Feto Maus iha Suco Matai Area Tabaco Loot no ida seluk Mina Matan Liu rai iha area Sanfuk, Suco Kamenasa.
Jornalista : Saturnino Soares
Editor : Chamot Nahac
