Covalima(RCCT) 20-11-21, Autoridade Inspesaun Fiskalizasaun Atividade Ekonomia Sanitária no Alimentar (AIFAESA), hala’o inspesaun ba loja sira iha Municipio Covalima, hodi prende sasan ne’ebé liu ona prazu no sasan ne’ebe lei bandu maibe kontinua fa’an iha loja no kioske sira.

Ko’alia ba Jornalista sira Xefe Seksaun Setor Primaria, Autoridade Inspesaun Fiskalizasaun Atividade Ekonomia Sanitária no Alimentar (AIFAESA), Armindo Gonsalves, Hatete hafoin hala’o inspesaun ba loja no kioske iha Postu Administrativu Zumalai konsege prende bevides liu prazu hamutuk 614 no iha postu Tilomar prende produtu sira ne’ebe lei bandu hanesan tabako Sek pohon sagu hamutuk 52, tabako Matahari hamutuk 82.

“Hahu hala’o inspesaun ba loja no kios sira hosi Postu Zumalai iha loron 17 Novembru konsege ami identifika produtu iregularidade balu ita hare katak estabelesementu komersial kontinua fa’an produtu liu prazu, iha ne’eba ita deteta bevides balu ho nia kuantidade 614 produtus anormal, nune’e mos loron 18 Novembru ekipa kontinua hala’o inspesaun iha Postu Tilomar konsege identifika produtu anormal liliu produtu lei bandu hanesan produtu pohon sagu ho kuantidade hamutuk 52 no tabako matahari 82 no ohin loron iha postu Suai konsege identifika produtu anormal liliu produtu alimentar ho kuantidade 107 no produtu tabako matahari no Shag hamutuk 100,” Katak Xefe Seksaun Setor Primaria iha AIFAESA, Armindo Gonsalves, ba jornalista sira hafoin hala’o inspesaun ba Merkado Suai, Sabado (20/11).

Momentu ne’e Xefe Seksaun Setor Primaria,dehan tuir prosidementu normal hafoin identifika produtu ne’ebé iregularidade sei elabora tuir prosesu no kondena kios ka loja na’in ho sansaun multa to’o dolares amerikanu rihun ida to’o rihun lima.

“ Prosesu hosi parte AIFAESA departamentu operasaun ekipa inspetor sira elabora prosesu depois submete ba gabinete juridiku, iha ne’eba sira mak sei hare no halo estuda depois mak foti desizaun, tanba tuir prosidementu normal ba produtu liu prazu tuir dekretu lei numero 23/2009 kona ba rejime infrasaun administrativa alimentar ba produtu liu prazu sei iha posivelmente aplika sansaun dolar Amerikanu rihun ida to’o rihun lima (U$ 1000-5000),” Tenik nia

Entertantu produtu ne’ebé lei bandu ekipa inspesaun sei elabora prosesu hodi deside, maibe parte juridiku no inspetor jeral AIFAESA.I.P mak deside ho valor tuir dekretu lei numeru 20/2016 selu koima ho valor dolar Amerikanu hitu nulu resin lima to’o rihun ida ($ 75-$1000).

Jornalista :Aje Ferreira

Editor      :Chamot Nahac