Covalima (RCCT) 10-09-21, Autoridade de Inspeção e Fiscalização da Atividade Económica Sanitária e Alimentar,I.P (AIFAESA,I.P) halo semináriu no divulgasaun kona ba papel AIFAESA, I.P no instrumentu legal nebe regula atividade ekonómiku iha Timor Leste.
Ba Jornalísta sira Sub-Inspetor Jerál AIFAESA, I.P Deonisio Neto da Silva hateten objetivu husi divulgasaun Papel AIFAESA, I.P ne’e, Atu Negosiante sira bele kumpri Lei nebe vigora iha Estadu ne’e, bainhira hala’o atividades negósiu.
“ Objetivu ne’e atu fahe liu tan papel AIFAESA, I.P nian ba públiku, para oinsa sira bele hala’o atividades negósiu ne’e bele kumpri duni lei nebe vigora ona iha Estadu ida ne’e, tamba ami atu kontrola operador ekonómiku nebe halo negósiu bainhira la iha lisensa entaun ida ne’e ami sei halo prosessu tamba lei la permite, depois ami kontrola mos ba fa’an produtu nebe prazu (Ekspair) tanba prejudika ba Saúde públiku ” Deonisio dehan iha nia intervista.
Deonisio Neto argumenta, Negosiante sira nebe hala’o negósiu kontra Lei nebe iha, AIFAESA, I.P sei halo prosessu tuir prosedimentu nebe AIFAESA, I.P implementa, Nia hatutan tuir lei númeru 14/2016 AIFAESA mos kontrola hodi halo intervensaun ba tabako ilegais sira nebe maka la permite atu hatama iha Fronteira.
“ Ba sira nebe maka halo negósiu kontra lei maka ami sei halo prosessu tuir prosedimentu nebe AIFAESA implementa, depois iha lei númeru 14/2016 konaba regime kontrola tabako, entaun ami kontrola mos tabako sira nebe maka ita nia lei la permite atu hatama, ne’ebe ida ne’e maka hatama entaun ami tenke halo intervensaun konaba ida ne’e ” Deonisio Tenik.
Iha fatin ne’e Sekretáriu Administrasaun Munisipiu Covalima Afonsu Nuguera Nahak husu ba Negosiante sira, bainhira fa’an sasan, labele hasa’e folin tuir ida-idak nia gostu, tanba ne’e nia husu negosiante hotu, tenke kumpri lei nebe vigora iha nasaun ida ne’e.
“ Ha’u hakarak hato’o ba ita bot sira katak, bainhira fa’an sasan la bele hasa’e folin tuir imi nia gostu deit, ha’u dehan ba imi katak ida ne’e imi kontra ona lei, depois labele fa’an sasan nebe maka prazu ona, nebe imi tenke tuir regras ne’ebe maka iha atu nune’e labele sai vitima iha futuru ” Afonso dehan.
Nune’e AIFAESA sei halo kontrola ba produtu alimentar ho noun alimentar, no kada semana rua AIFAESA sempre halo monitorizasaun ba presu sasan iha merkadu hahu husi distribuitor to’o negosiante ki’ik sira.
Entretantu Semináriu divulgasaun papel AIFAESA, I.P ba Negosiante sira ne’e realiza iha Salaun Administrasaun Munisipiu Covalima, nebe partisipa husi Sekretáriu Administrasaun Munisipiu no Komandante PNTL Covalima no partisipa máximu husi Negosiantes sira nebe durante halo aktividade negosio iha Munisipiu Covalima.
Jornalísta : Tynho Gusmão
Editor : Chamot Nahac
