Agapito Axis “Benefisiárius 1,161 iha Covalima mak hetan Apoio fos husi Governo ba trimestre III”

Covalima (RCCT) 27-07-21 Ministériu Solidariedade Sosiál e Inklusaun liu husi Sentru Solidariedade Sosial e Inklusaun iha Municipio Covalima sei distribui fos ba grupu vulnerável iha Postu Administrativo lima ba trimestre III ba tinan 2021.

Segunda Feira horiseik (26-07) Diretor Sentru Solidariedade Sosial e Inklusaun iha Municipio Covalima Agapito Axis hateten, Distribuisaun fos ne’e ba Família vulneravel hamutuk 1,161 ho total fos 1,161, nebe sei distribui hahu Tersa Feira ohin (27-07) no sei remata iha Loron 10 fulan Agostu tinan ne’e.

“Planu ne’e iha trimestre ida ne’e ita sei distribui fos ba grupo vulnerável sira iha Postu Administrativu lima, (Suai, Maukatar, Zumalai,Fatumea,Tilomar)total Benefisiárius hamutuk 1,161 total fos mos hanesan 1,161 planu ida ne’e integradu, ita enkordasaun ho Autoridade Lokál nomos Administrador Municipio no Instituisaun relevantes sira atu nune’e prosessu ne’e bele la’o ho diak ”  Diretor ne’e dehan iha nia kna’ar Fatin.

Diretor Agapito Axis konsidera Situasaun Sérka Sanitária desde inisiu to’o agora, fo impaktu bo’ot ba Familia vulnerável sira, tan ne’e Governo liu husi Ministériu Solidariedade Sosiál e Inklusaun planeia oinsa bele responde situasaun nebe maka Familia vulnerável infrenta.

“Ita hare liu ba impaktu husi SS desde inisiu to’o agora, impaktu ne’e bo’ot liu ba Familia vulnerável sira, tanba ne’e maka Governo liu husi MSSI planeia oinsa bele responde situasaun nebe maka ita nia familia vulneravel sira enfrenta, ho ida ne’e maka ita halo planu distribuisaun no sei kontinua nafatin ” Diretor ne’e dehan.

Entretanto distibuisaun nebe hahu ohin hanesan kontinuasaun husi trimester I no II nian, no iha trimestre III ne’e, no husi total Benefisiárius hamutuk 1,161 ne’e, kompostu husi ema ho Difisiénsia sira.

Jornalísta : Tynho Gusmão
Editór       : Chamot Nahac